La colezion preistoriche si compon vuê di 225.000 reperts catalogâts, che a cjapin dentri un interval cronologjic che al va dal Paleolitic Medi ae prime Ete dal Fier, risultâts des ricercjis e des scuviertis fatis in plui di 130 localitâts dal teritori furlan. Te colezion a son: 
- materiâi litics (siliç, ossidiane, piere verde, piere pesante),
- recipients e ogjets di art di arzile,
- manufats di vues e di materie dure di animâl (vues, cuar, palc),
- reperts di metal,
- vues di animâi,
- rescj antropologjics.

La prime serie inventariade de colezion e je chê dal Landri di Robič, une grote pôc a Nord dal pas di Stupize, cumò in Slovenie, che Achille Tellini, naturalist furlan, al à indagât tal 1894. Plui indenant la colezion si è insiorade di altris materiâi che a rivin di altris landris des Valadis dal Nadison, tant che par esempli Velika Jama, Çondar des Paganis, Foran di Landri e Šuošterjova Jama, che a son stâts sgjavâts dai socis dal Circul Speleologjic Furlan tai prins decenis dal secul passât e che di pôc a son deventâts l’ogjet di un gnûf progjet di ricercje.

Midiant di ricercjis realizadis sul teren, la sezion e conserve i materiâi di un altri sît des Valadis dal Nadison, il Ripâr di Biarç, e di cualchi sît neolitic inte planure, tant che Samardencje (Puçui) e Blancjade (Palaçûl) e Naiarêt de Tor.

Consulte la bibliografie di Preistorie dal Friûl-Vignesie Julie. .