Il Plan Paisagjistic Regjonâl (fat bon cul DZR 771-2018) al à il fin di integrâ la tutele e la valorizazion dal paisaç intai procès di trasformazion teritoriâl, ancje come stimul impuartant pe competitivitât de economie regjonâl. Il Museu Furlan di Storie Naturâl, in colaborazion cun altris ents (Regjon F-VJ, UNIUD, UTI Cjargne, ERPAC) e in coplanificazion cul MiBACT, al à contribuît aes liniis vuide pe progjetazion de Rêt Ecologjiche teritoriâl. Par rêt ecologjiche si intint un sisteme di areis naturâls o seminaturâls che a àn la funzion di protezi la biodiversitât dal teritori, cu la creazion di spazis adats pe presince des speciis e par incressi la capacitât di trasferiment e di contat tra popolazions. La rêt ecologjiche si definìs tant che un sisteme interconetût di habitats naturâi e seminaturâi slargjâts in dut il paisaç, che a permetin di mantignî lis cundizions fondamentâls par tutelâ chês popolazions di speciis animâls e vegjetâls che la ativitât umane e podarès menaçâ. In tiermins gjenerâi, la rêt ecologjiche e à un caratar multiscalâr e specie-specific, ven a stâi che i elements che le componin a àn carateristichis funzionâls diferentis se si lein su scjale regjonâl o locâl e cheste e pues mudâ daûr des speciis individuadis. Il lavôr al à vût une fase di studi sperimentâl in ciertis areis regjonâls midiant di une metodologjie articolade in doi moments: prin la identificazion dai percors conetîfs potenziâi cu la analisi funzionâl dal teritori, ancje zovantsi di programs software specifics, dopo de sielte de bande dal ent teritoriâl dai ponts e dai coridôrs di protezi, infuartî o progjetâ par garantî la conetivitât ecologjiche locâl. I elements de Rêt Ecologjiche Locâl a son rapresentâts tes realtâts di singui habitats, di grups di habitats naturâi, o di mosaics di paisaç plui o mancul grancj dulà che areis urbanizadis, areis coltivadis e elements naturâi (cisis, filârs di arbui, prâts, boscs residuâi) si dan la volte cuntune densitât diferente. Si à duncje di individuâ ambits di potenziâl conession ecologjiche e ambientâl ae scjale locâl, contribuint al obietîf gjenerâl di un svilup compatibil e bon di durâ.

E je une ativitât realizade tal ambit dal acuardi di colaborazion cu la Regjon Friûl-Vignesie Julie par studiâ, monitorâ e divulgâ cun chê di prevignî e fâ front ae difusion di speciis vegjetâls neofitis invasivis, cun potenziâl invasîf e di rilevance unionâl (2016). Il probleme de invasion di speciis neofitis (o alienis) al è deventât aromai une vore atuâl, tant che in Europe a àn publicât di pôc un regolament (REGOLAMENT UE N. 1143/2014) che al insuaze i aspiets peâts al control de lôr difusion e aes strategjiis par evitâ gnûfs ingrès intai Paîs de Union. Une specie si le definìs esotiche cuant che e je intun teritori diferent di chel che al corispuint ae sô aree naturâl di distribuzion, o ben e rive di une altre zone gjeografiche. Lis speciis si puedin movi ancje in maniere naturâl, ma tal câs des neofitis la introduzion intun teritori e je simpri leade al om e e pues jessi volontarie, come pes speciis coltivadis cun fins ornamentâi o alimentârs, o acidentâl, se chestis a rivin midiant di trafics comerciâi o, in gjenerâl, di cualsisei trasferiment di oms e mieçs di un Paîs a chel altri. Su chest cont, lis viis di comunicazion principâls, tant che lis liniis feroviariis, lis autostradis e v.i. a àn un rûl fondamentâl te difusion di chestis plantis. Cuant che une specie esotiche e rive intun teritori gnûf, o e je za coltivade in parcs, zardins o vivârs, e podarès cjatâ lis cundizions climatichis adatis par podê slargjâsi di bessole. In cualchi câs chestis entitâts a rivin a difondisi a tâl pont che a deventin invasivis, cun consecuencis negativis su la biodiversitât, la percezion dal paisaç e la sfere socioeconomiche. Tantis voltis si trate di speciis pionieris o che a vegnin sù tra lis maseriis: ve duncje parcè che la degradazion dai sistemis naturâi e favorìs la lôr rivade e difusion. I problemis causâts des speciis neofitis, massime se invasivis, a son tancj: dal incuinament biologjic dai ecosistemis locâi ae compromission dai sistemis agricui, ai dams pe salût dal om. Plui in gjenerâl, si pues afermâ che lis invasions biologjichis a compuartin efiets negatîfs sui servizis ecosistemics, definîts come il complès des componentis dal ecosisteme, i lôr procès e lis lôr funzions (Millennium Ecosystem Assessment, 2005). Al è clâr che a coventin misuris adatis de bande des Aministrazions par podê limitâ plui che si pues il fenomen e evitâ la pussibilitât che la situazion e ledi inmò plui in piês, in curt o tal avignî. Chestis azions a varessin di fondâsi su la cognossince de entitât dal fenomen e su la sô interpretazion corete daûr de diferente destinazion di ûs dal teritori. Al è in chest contest che si incuadre la ricercje che il Museu Furlan di Storie Naturâl al à realizât, in colaborazion cu la Regjon Friûl-Vignesie Julie, par cjapâ sù propit i criteris pe gjestion teritoriâl finalizâts a contignî la difusion des speciis invasivis. In particolâr, i obietîfs specifics a son stâts:
1 - inzornâ la check-list des speciis vegjetâls neofitis dal Friûl-Vignesie Julie:
2 - Elaborâ un model di relazion fra la difusion des speciis alienis invasivis e lis dinamichis dal ûs dal teren su scjale regjonâl:
3 - Proponi cualchi linie vuide par prevignî e/o limitâ la invasion di speciis alienis.

La faune di aghe dal Cjanâl di Ucee no je tal complès tant cognossude e i pôcs dâts a disposizion a son leâts a invertebrâts macrobentonics e a meiofaune des fontanis, e tra chês ancje la stesse fontane dal torint Ucee. De faune interstiziâl iporeiche, che e vîf tai sediments ingrumâts tal jet dal flum, fin a vuê no si saveve nuie. La ricercje e à volût suplî a cheste mancjance, ancje tignint cont de impuartance ecologjiche di cheste componente che e agjìs (a) di zone di ricet des speciis di superficie tai moments di crisi idriche, (b) di zone di svilup dai prins stâts larvâi dai macroinvertebrâts bentonics, e (c) tant che habitat principâl o secondari di speciis de meiofaune (par solit cun dimensions plui piçulis dal mm) che a puedin ancje jessi esclusivis di chê aree (stigobis freatobionts). Dilunc dal cors dal Ucee a son stadis individuadis 8 stazions diferentis, dulà che si son fats campionaments di macroinvertebrâts bentonics e realizadis racueltis di faune interstiziâl iporeiche doprant diviersis metodologjiis. A nivel faunistic, i risultâts plui interessants a àn tocjât la componente stigobie, plui siore dongje des fontanis e te part esterne dal foran. E merete segnalade la individuazion di crustacis sincarits dal gjenar Bathynella, une novitât assolude pe faune dal Ucee, o altris câs di crustacis cupepots. Al è stât prelevât tant macrozoobenthos, che cumò i specialiscj a son daûr a identificâ in maniere specifiche dopo vêlu prin dividût a nivel di Ordin. Lis racueltis di Efemerotars e Plecotars, integradis cui dâts precedents, publicâts e no, a àn permetût di butâ jù une checklist preliminâr, che si sta par implementâ.

Daûr de leç Regjonâl 42 dal 1996, i biotops a rapresentin piçulis areis di interès naturalistic, tuteladis a nivel locâl, dulà che ativitâts antropichis idoniis e compatibilis a puedin convivi cu la conservazion dai habitats. Tancj biotops a son stâts istituîts dopo che la leç e je jentrade in vore, lant daûr des propuestis di rapresentants dal mont de ricercje, dai ents locâi e des associazions naturalistichis. Cun di plui, numerôs biotops a fasin part in maniere integrâl o parziâl dal ambit di areis di interès european daûr de Diretive 92/43 CEE “Habitat”, (ZPS, ZSC, par esempli Palût Fraghis, Torbere di Secuals, Torbere di Cjasesole, Risultivis di Vuirc di Flambri e altris ancjemò), rimarcant la lôr impuartance. La plui part dai biotops che no son dentri di sîts di interès comunitari, a àn pal solit estensions piçulis e, ancje se spes a dan acet a strichis di habitat une vore interessantis e/o speciis raris e endemichis, a àn pôcs struments di tutele. Il progjet par un studi dai habitats e par une lôr trasposizion cartografiche a une scjale di detai (1:5000) al ven dal fat che chestis piçulis areis protezudis no son mai stadis studiadis in maniere specifiche fin a vuê, fûr che cuant che i lôr confins si soreponin in part cun chei dai SIC-ZSC, e in chel câs a son stâts realizâts i Plans di Gjestion, o pûr in chês pocjis situazions li che a son stâts ogjet di analisi tal ambit di particolârs Progjets Life. Par chel che al inten l’incuadrament de vegjetazion, si à sielzût un nivel fitosociologjic che si pues fâ corispuindi cun facilitât a un habitat Natura 2000 e a chel ripuartât a nivel regjonâl tal Manuâl dai habitats. Il progjet si è sierât cu la publicazion dal volum monografic editât dal Museu “I Biotops dal Friûl-Vignese Julie. Un mosaic di biodiversitât”.

Il progjet, finanziât dal program di cooperazion teritoriâl europeane Interreg V Italia-Austria 2014-2020, al à previodût la creazion di un Gjeoparc transfrontalîr par valorizâ il patrimoni gjeologjic e elaborâ strategjiis di svilup sostignibil de aree, infuartint la cussience dal so valôr, favorint l’ecuilibri tra cressite e buine gjestion dal ambient, promovint la culture sientifiche, incressint la ufierte turistiche dal teritori interessât.
Partners di progjet:
• Comun di Udin – Museu Furlan di Storie Naturâl
• UTI de Cjargne
• UTI dal Cjanâl dal Fier-Valcjanâl
• Geopark Karnische Alpen
• Regjon Autonome Friûl-Vignesie Julie – Servizi Gjeologjic
• Provincie di Bolzan – Museu di Siencis Naturâls dal Sudtirôl.
Par vê plui informazions si pues consultâ il sît dedicât ae iniziative .

Lis indagjins di superficie che cualchi apassionât al à realizadis tai agns Novante dal secul passât tal jet de Tor a àn puartât spes a scuvierzi olmis di antropizazion peadis ae Preistorie e ae Protostorie. A son zonis dulà che reperts litics e ceramics, in cualchi câs faunistics, a vegnin fûr cu lis montanis dal torint. Tal 2007 il personâl dal Museu al à tacât un progjet di gjeoreferenziazion dai sîts che i materiâi a son conservâts tal so dipuesit, par preservâ un dât clâr e unic su la lôr posizion; dilunc di chest progjet e je stade fate cualchi verifiche tal jet de Tor che e à permetût di regjistrâ lis coordenadis gjeografichis di sîs localitâts. La impuartance sientifiche dai elements cjatâts, che a testemonein moments de Preistorie che in provincie di Udin si scuegnin ancjemò descrivi tal detai, e il pericul costant che al interesse chestis areis, a àn conseât di inviâ indagjins stratigrafichis plui precisis tes zonis di emersion za cognossudis e in chês che a vignaran a flôr cu la azion dai events naturâi. Lis ricercjis a Naiarêt de Tor a son tacadis tal 2015, la aree des indagjins, za di une prime osservazion, e jere caraterizade di trê zonis antropizadis diferentis che a son stadis esaminadis in chel an, evidenziant une struture a pocet e une largje aree antropizade. I materiâi cjapâts sù a van indaûr al Neolitic antîc, ma si son cjatâts ancje elements che a documentin la frecuentazion tal III mileni p.d.C., une fase cronologjiche ancjemò pôc cognossude in regjon che culì e furnìs une des raris atestazions talianis dal stîl di Cetina, slargjât pal plui tal Adriatic orientâl. Te aree, interessade di numerosis variazions par vie des ondadis di plene dal Torint, a van indenant i sorelûcs.

Cui tiermins “piçui mamifars” o “micromamifars” si intint un grup di bestiis di dimensions pal plui piçulis o mediis piçulis, cence valôr sistematic. Di fat, in cheste categorie a son cjapadis dentri plui speciis diferentis di animâi, che a fasin part dai ordins  Rodentia, Soricomorpha, Erinaceomorpha. Pal ecosisteme, la funzion dai piçui mamifars e je une vore impuartante: midiant de ativitât di sgjâf a crein une rêt di galariis soteraniis dopradis po dopo ancje di altris speciis animâls (anfibis, retii, invertebrâts). Cun di plui, i roseadôrs, soterant e ingrumant lis semencis dentri covis e foncs a favorissin la lôr difusion. Infin, a rapresentin un anel un grum impuartant di diviersis cjadenis alimentârs, stant che par cualchi specie di vertebrâts a son une risorse fondamentâl. Un ultin aspiet ancjetant significatîf al è che chest grup nol è tant cognossût, massime la sô difusion. Par chest motîf, adun cul Parc Naturâl Regjonâl Prealps Juliis al è stât inmaneât un progjet di ricercje plurienâl par cognossi chescj animâi di un pont di viste ecologjic e distributîf. Il risultât dal progjet al è stât creâ une base di dâts cui riferiments gjeografics de presince des speciis, e une publicazion sientifiche divulgative, edite dal Parc Prealps Juliis in colaborazion cul Museu.

Intal teritori aministrât de Regjon Autonome Friûl-Vignesie Julie al somearès che e sedi presinte une trentine di speciis di gnotui, dutis tuteladis cu la massime atenzion a nivel european, integradis in diviers documents che la Diretive Habitat 92/43 CEE e à in zonte. Chestis bestiis a son di protezi pes cundizions precariis di conservazion che tantis di lôr a àn, jessint dal sigûr tra chês plui sensibilis ai mudaments ambientâi causâts dal om. Chestis speciis a son tuteladis in maniere integrâl de Leç taliane (art. 18 de L. 349/1986; art. 2 de L. N. 157/1992) e di diviersis Convenzions internazionâls ratificadis ancje in Italie (des zontis II e III de Convenzion di Berne, in Italie fate buine cu la L. 503/1981; de zonte II de Convenzion di Bonn, fate buine cu la L. 42/1983 e dal sucessîf Acuardi su la Tutele dai Gnotui Europeans, indicât cul acronim EUROBATS; des zontis B e D dal D.P.R. 357/1997 su la aplicazion de Diretive Habitat 92/43 CEE). Ancje se di resint e je stade publicade cualchi testemoneance che e dimostre la incressite di chestis bestiis in plui parts de Europe, al è ben vê la prudence di continuâ a calcolâ i gnotui tant che une specie in grant pericul. Dut câs, tal teritori de Regjon Autonome Friûl-Vignesie Julie, i gnotui no si ju cognòs ancjemò tant: par chest, la Aministrazion de Regjon Friûl-Vignesie Julie e à incjariât il Museu Furlan di Storie Naturâl di monitorâ chest grup delicât di animâi, slargjant la ricercje su dut il teritori de regjon Friûl-Vignesie Julie, un progjet intitulât “I Chirotars protets de Diretive Habitat 92/43 CEE inte Regjon Autonome Friûl Vignesie Julie. Monitoraments 2013-2014”, che po dopo al à slungjadis lis ativitâts fin al 2015.  Ae fin dal lavôr, si è lâts dilunc a monitorâ e a racuei dâts e chest al è daûr a dâ grancj risultâts, fondamentâi massime pe conservazion e pe gjestion dal teritori. Lis ativitâts si indreçavin prime di dut a verificâ i lûcs di agregazion e di letarc; intal stes timp, par incressi i dâts disponibii e par capî miôr la situazion complessive, a son stâts doprâts sistemis di cature sofisticâts e si son fatis verifichis bioacustichis; a chescj dâts si son dopo zontadis lis verifichis ocasionâls furnidis de colaborazion spontanie di citadins, ents publics e privâts.

Program pe cooperazion transfrontaliere Interreg Italie-Slovenie 2007-2013 WP2-Progjetazion di une metodologjie uniformade di monitorament e di analisi dal impat dai cambiaments climatics su la biodiversitât (2011-2012). Il studi al veve l’obietîf principâl di elaborâ un protocol par valutâ e monitorâ, a curt e a medi lunc tiermin, i impats dal cambiament climatic su lis speciis vegjetâls, su cualchi specie faunistiche che e fâs part dai ecosistemis di tiere e, dulà che al jere pussibil, ancje lis lôr potenziâls interazions cui components abiotics plui sensibii (in particolâr chei de criosfere) intal teritori furlan, intal ambit dal Progjet Interreg Climaparks, massime par ce che al tocje il Parc Regjonâl des Dolomitis Furlanis e il Parc Regjonâl des Prealps Juliis. Par che il studi dai cambiaments climatics al fos util, a son stâts sielzûts chei ecosistemis cun struture e composizion semplicis, in ambients dulà che a fossin ridots al minim i elements variabii che no àn une relazion direte cui procès analizâts. Intai sistemis ambientâi di mont, lis componentis plui sensibilis a son la vegjetazion, lis bestiis e, pes parts abiotichis, i glaçârs e lis areis cun permafrost, pe lôr grande dipendence dal clime e dal belanç energjetic de superficie. Tignint cont che no je ciertece assolude par ce che al rivuarde la scjale spaziâl e temporâl che e manifeste i efiets dal cambiament climatic, a son stadis planificadis ativitâts di monitorament multiplis, calcolant aspiets e procès integrabii tra di lôr, a nivel di speciis singulis e di comunitât, sedi daûr de scjale di plots (tocs di teren) singui, che di areis plui largjis.
Lis metodologjiis dopradis a son stadis chestis: 
1) Monitorament di comunitâts vegjetâls singulis intal ambit di Plots permanents;
2) Elaborazion di une cjarte fitosociologjiche de vegjetazion che e puedi jessi un pont di riferiment par monitorâ a medi e lunc tiermin (15-20 agns) lis variazions potenziâls di distribuzion spaziâl e par areis, e la composizion de flore des comunitâts vegjetâls;
3) Analisi eventuâl de fenologjie des speciis vegjetâls target (tal ambit dai plots selezionâts tal pont 1);
4) Monitorament dal ûs dal teren e dai siei eventuâi mudaments;
5) Studi par diference altitudinâl, sielzint altecis diferentis parsore de linie ultime dal bosc;
6) Studis par ecosistemis cun grât potenziâl di sensibilitât alt, par esempli prâts di alte mont e vals cun nêf permanente;
7) Eventuâl monitorament di procès di colonizazion e di moviment in lûcs dulà che la vegjetazion e je une vore peade a formis glaciâls e/o periglaciâls.
Par ce che al inten la componente faunistiche, il protocol al previôt il monitorament des comunitâts cun carateristichis faunistichis sielzudis in base ae lôr idoneitât – za verificade – a fâ di bioindicadôrs. In particolâr, si à previodût di monitorâ: Lepidotars, Coleotars Carabits e Ragns tra i invertebrâts di tiere; diviers grups di macroinvertebrâts di aghe e, tra i vertebrâts, Uciei di nît. Pai invertebrâts di tiere, la struture dal monitorament si fonde su la individuazion di stazions di campionament in plots permanents, disponûts ogni 100 metris di disnivel, daûr di fassis altitudinâls che a van dal plan subalpin a chel cu la nêf permanente, se pussibil in coincidence cun chei previodûts pal monitorament des comunitâts vegjetâls. Pai macroinvertebrâts bentonics des aghis corintis, si à in program di selezionâ trê bacins idrografics in ducj i Parcs: si previôt il campionament dai trats di risultive (crenal) e epiritrâl te part alte dal riul o dal torint principâl. Il studi des comunitâts di uciei di nît, infin, si previôt di fâle midiant de tecniche de conte des presincis tai ponts di scolte logâts intai stes plots preparâts pai invertebrâts di tiere.

L’Ent Parc des Dolomitis Furlanis al à incjariât il Museu Furlan di Storie Naturâl di censî la flore dal teritori di sô competence. Par chest e je stade firmade une convenzion tra i doi Ents par un studi preliminâr de flore in cualchi aree dal campion, daûr de lôr rapresentativitât intal teritori dal Parc e de fruibilitât turistiche. Chestis areis a son stadis dividudis intune rêt di 6,5 x 5,5 km – che e corispuint ai cuadrants de Cartografie Floristiche Centrieuropeane (o MTB, Ehrendorfer & Hamann, 1965) – in maniere che, ae fin de ricercje, si vedi un cuadri il plui pussibil complet di cemût che la flore si distribuìs intal Parc, in particolâr: lis speciis endemichis; chês ripuartadis intai documents di zonte des diretivis comunitariis (massime la 43/92/CEE); chês citadis tes listis rossis nazionâls e regjonâls, e/o che a son tuteladis di cualchi norme. Duncje, in cheste fase, la division de aree par cuadrâts e coventave par impuestâ un progjet di cartografie floristiche e par cirî di descrivi la difusion des speciis interessadis. Il belanç des ativitâts al è stât intal complès positîf, cuntune grande incressite des segnalazions floristichis e dai dâts di distribuzion gjeografiche; a son stadis scuviertis speciis interessantis, e tra chês ancje presincis gnovis, mai vudis prime in Friûl-Vignesie Julie ( Poa chaixi, Helictotricon parlatorei). La racuelte di speciis in pericul ( Alchemilla, Hieracium, Rubus, Knautia) e je stade buine. Ancje dal pont di viste dal ambient vegjetâl, si son scuvierts diviers aspiets interessants e si à podût sclarî miôr cemût che a interagjissin tra di lôr lis speciis vegjetâls intal teritori dal Parc, massime in relazion al lôr significât a nivel di habitat Natura 2000. Al è stât individuât cualchi lûc di valôr naturalistic particolâr (M. Bosè-prats di Salte, zonis umidis dal Vaiont, prâts des Centenere) sedi pe ricjece des speciis che pal lôr significât biogjeografic.
Cuant che la ricercje e je finide, il Parc al à publicât un libri intitulât “La flora del Parco: invito alla scoperta del paesaggio vegetale nel Parco Naturale Dolomiti Friulane”.

Il Museu al à disvilupât il “Progjet roiis di Udin” cun chê di studiâ il teritori urban dal pont di viste de cualitât ambientâl, massime i aspiets de flore e de faune, cence però lassâ di bande chei storics, che a rapresentin il contest li che il sisteme des roiis si è evolût, di cuant che lis àn improntadis par frontâ la dibisugne di aghe de citât di Udin. Studiâ prime di dut la componente naturalistiche al è une fase necessarie intun progjet di conservazion de biodiversitât e di svilup sostignibil. Intune prospetive urbanistiche, duncje, cheste ricercje e je un imprest util pe planificazion. La conservazion dai habitats naturâi o seminaturâi intun contest urban e je di fat fondamentâl, parcè che la biodiversitât e je un indicadôr de buine gjestion dal teritori daûr dal principi dal svilup sostignibil. Il “Progjet roiis di Udin” si è duncje incentrât su la indagjin de cualitât bioecologjiche dai cors di aghe de citât, studiant lis comunitâts vegjetâls e faunistichis par valutâ il grât eventuâl di savoltament patît e cirî soluzions che, cuntune gjestion cussiente, a puedin puartâ il plui pussibil in miôr l’ambient.

La aree alpine e prealpine des Juliis ocidentâls, pe sô posizion particolâr isolade e sul ôr dal arc alpin meridionâl, e presente elements impuartants peâts ae struture faunistiche preglaciâl, e une faune une vore tipiche dal pont di viste biogjeografic, cun evidentis infiltrazions rivadis dal Sudest de Europe balcaniche. Il progjet al à previodût doi monitoraments trienâi dal 2001 al 2008 (“Monitorament di Bioindicadôrs di passons e faêts" fat sul teritori setentrionâl dal Parc, e il “Monitorament faunistic di Invertebrâts in ambients naturâi de aree meridionâl dal Parc”) che a àn permetût di rilevâ inte aree une componente faunistiche di impuartance assolude, cun tantis speciis ancje di grant valôr naturalistic. A son stadis cjatadis numerosis particolaritâts faunistichis, tra chês cualchi specie gnove pe Sience, par esempli il Molusc Gasteropot Limax giovannellae, esclusîf des Prealps Juliis, e il Coleotar Curculionit Dichotrachelus kahleni, esclusîf locâl (Alps Cjargnelis e Prealps Juliis), scuvierts tal Grup dal Plauris. A son stadis tantis ancje lis segnalazions di speciis faunistichis gnovis pe Italie o pes Alps Sudorientâls. In plui, cui dâts otignûts si à podût disvilupâ une gjestion corete de aree par tutelâ e valorizâ la biodiversitât e chês che a son lis emergjencis faunistichis. In prospetive, i dâts a costituissin il prin pas par preparâ un database de faune dal Parc che al puedi jessi un pont di partence par un atlant faunistic regjonâl cun finalitâts conservativis e gjestionâls, salacor di slargjâ tal avignî ancje a dut il teritori montan des Alps Juliis e Cjargnelis.

Il Museu al à coordenât lis ricercjis sui lichens e lis briofitis intal Parc des Prealps Juliis, in colaborazion cul Dipartiment di Biologjie de Universitât di Triest. I macrolichens a son stâts censîts su la Mont di Musi e la Mont di Plauris – ben cognossudis par jessi la aree di contat di carateristichis biogjeografichis europeanis e mediteraniis – dentri di Unitâts Gjeografichis di 2,75 x 3,25 km e in corispondence cun ambients diferents, par esempli boschetis di mughe, faêts, crestis di claps, mûrs a sec. A son stadis censidis 177 speciis. Confrontant lis dôs areis, al è vignût fûr che te Mont di Musi e je plui biodiversitât che te Mont di Plauris: cun cirche 1100 campions si à podût censî ben 109 taxa, e tra chei 3 a son gnûfs pe flore regjonâl ( Cladonia ramulosa, Collema conglomeratum e Lempholemma polyanthes). La tabele de flore de Mont di Plauris, basade su la identificazion di cirche 500 campions, e à cjapât dentri dome 68 taxa, e tra chei però ancje cualchi specie mai segnalade prime in cheste localitât, par esempli la Hyperphyscia adglutinata. Intal complès, il studi nol à evidenziât emergjencis di interès sientific ecezionâl, se si gjavin lis gnovis segnalazions floristichis che o vin dit; dut câs, i risultâts de indagjin a son istès une documentazion une vore impuartante parcè che intal avignî a podaran jessi un tiermin di confront par verificâ eventuâi mudaments. Un dât impuartant che al è vignût fûr al è che i faêts a rapresentin un ambient une vore interessant pal disvilup di une flore siore di macrolichens, se i boscs a son antîcs, cun plantis di etâts diferentis e no masse sierâts: cundizions dut câs avonde raris. Par chest, l‘Ent Parc al à ricevût sugjeriments par gjestî i faêts di mût che a puedin incressi i macrolichens.

Il Progjet di ricercje al inten il "Monitorament de componente faunistiche dai Biotops naturâi dal Friûl-Vignesie Julie", firmade dal Museu Furlan di Storie Naturâl di Udin e de Aziende dai Parcs e dai Boscs Regjonâi dal Friûl-Vignesie Julie. La Diretive 92/43/CEE, cognossude tant che Diretive Habitat, e domande ai Stâts membris de Union Europeane di individuâ intal lôr teritori sîts di interès comunitari (SIC) selezionâts daûr de presince di habitats, naturâi o seminaturâi e, par chel che al tocje la faune, lis speciis che a son presintis tal document di zonte II de Diretive (speciis raris, endemichis, menaçadis o in pericul di estinzion). In plui dai sîts di interès comunitari (SIC), il Ministeri dal Ambient al à promovût un progjet di pueste (Progjet Bioitaly) che al à permetût di individuâ sîts di interès nazionâl (SIN) o ancje regjonâl (SIR). I SIC e i SIN che no fasin part dai Parcs o des Risiervis dal Friûl-Vignesie Julie, e che pal solit a son piçui, si clamin "biotops". Chest progjet achì si concentre su 18 biotops regjonâi. A son stâts sielzûts diviers grups tassonomics calcolâts tant che bioindicadôrs (moluscs, crustacis e, tra i insets, efemerotars, odonâts, plecotars, coleotars, ortotars e lepidotars): par ognidun si è preparât un protocol metodologjic di lavôr precîs. Intal complès, lis speciis racueltis intai biotops studiâts a son 2200, dividudis tra i diviers grups tassonomics sielzûts. In gjenerâl, i risultâts dal monitorament a mostrin che i lepidotars, sedi pes tantis speciis presintis, sedi pal lôr leam cu la vegjetazion, e duncje cui fatôrs climatics, a son bioindicadôrs ecelents su scjale gjeografiche. Invezit, i coleotars carabits a àn dimostrât di jessi un grup che al permet di valutâ la biodiversitât di singui microhabitats e, stant che a son peâts ae faune dal teren, si prestin miôr a metodologjiis di indagjin une vore seletivis pes diviersis tipologjiis ambientâls (par esempli, boscs, prâts, torberiis). Altris grups, invezit, si son mostrâts mancul adats ae valutazion cualitative ambientâl, massime chei plui vistôs e siôrs di speciis bandiere, par esempli i ortotars e i odonâts. In gjenar, daûr dai risultâts otignûts, ducj i biotops a son meritevui di tutele pal fat che a rapresentin dut ce che al reste di une trame ambientâl naturâl tant plui largje, ma che aromai e je daûr a sparî a la svelte, massime tes areis pedeculinârs e di planure.

Lis ricercjis stratigrafichis dal Museu intal sît neolitic di Samardencje a son tacadis intal 1985; a son ladis indevant fin al 1989, cu la colaborazion dal Museo Tridentino di Scienze Naturali. Tal 1994, dopo cualchi an di polse, il studi al è lât indevant cu la colaborazion dal Dipartiment di Storie de Civiltât Europeane de Universitât di Trento. In plui di 15 agns di sgjâfs, la poie de Aministrazion comunâl di Puçui e dal Gruppo Ricerche “Aghe di Poç” no je mai mancjade: si à podût cussì scuvierzi 321 sotstruturis neolitichis (datadis tra i 5.500 e il 4.500 p.d.C. cirche) che a son dome une piçule part di chês che si pense che a sedin ancjemò sot tiere. Si trate pal plui di: fuessis, plui o mancul regolârs, poçuts cilindrics, raris busis pai pâi e struturis plui largjis, par esempli un poç cistierne cuntun diametri di cualchi metri par racuei la aghe; cualchi cogul e un sisteme di doi fossâi par protezi un vilaç e drenâ lis aghis. Il materiâl archeologjic cjapât sù al è stât catalogât e studiât in maniere tecniche e sientifiche.

Tra il 1982 e il 1985, tal Ripâr a son stâts fats sgjâfs stratigrafics, sot de direzion di Francesca Bressan dal Museu Furlan di Storie Naturâl e di Antonio Guerreschi de Universitât dai Studis di Ferrara. Cuatri campagnis di sgjâfs a àn lavorât suntune aree di cirche 4 m2. Il lûc, logât daprûf de rive di man çampe dal Nadison (San Pieri dai Sclavons), al presente une secuence impuartante di strâts che a van dal Paleolitic superiôr ae etât dal Bronç. Il nivel plui antîc (US 5) al va indaûr al Epigravetian resint, invezit chei parsore (UUSS 4, 3B e 3A) si puedin datâ il prin te ete mesolitiche antighe (Sauveterian) e il secont tal Mesolitic resint (Castelnovian). Il Ripâr di Biarç al è un dai sîts principâi par ricostruî il popolament de Italie nordorientâl a scjavaç tra Pleistocen e Olocen: par chest, a tacâ dal 2010, il Museu e la Universitât di Ferare a son lâts indevant a studiâ i campions naturalistics cjapâts sù intant dai sgjâfs. Tra i risultâts di chestis indagjins o ricuardìn il studi gjenetic sui rescj di purcits, cjatâts tai nivei mesolitics, che a àn permetût di ipotizâ che cheste specie in chê zone e fos stade dumiesteade.