Un dai aspiets plui interessants e inovatîfs dal progjet dal Gnûf Museu al è l'ûs de grande superficie verde dal zardin dulintor.
Di là dal valôr estetic impuartant di chescj spazis, si è decidût di doprâ il so podê evocatîf par frontâ il teme dal rapuart tra l’om e la nature.
La âf dumiestie ( Apis mellifera) e je cognossude parcè che e prodûs mîl e altris prodots, tant che il propoli e la cere. E vîf in coloniis organizadis, cuntune regjine, miârs di operariis e, cuant che si riprodûs, cualchi mascli (i avons). La colonie si le pues calcolâ tant che un superorganisim, fat di miârs di organisims interdipendents. Pal fat che a impolinin tantis plantis, lis âfs a contribuissin ancje ae biodiversitât. Chescj insets, e ancje chei altris impolinadôrs, a doprin une vore lis plantis aromatichis. Tantis di lôr, come l’osmarin, la salvie, la lavande, l’ulîf mat o la urtie di bosc no àn dome une funzion estetiche, ma cu lis lôr floriduris scjassosis e bondantis a son ancje une font preziose di netar e di polin. Ancje par realizâ chestis borduris, dongje di plantis ornamentâls tant che cualchi varietât agrarie di Nepeta e di Salvia, si à sielzût di meti speciis presintis in nature tal bacin dal Mediterani, tant che l’osmarin o la jerbe de fiere.
Tal zardin dal Museu al è stât metût un bug hotel. Un bug hotel al è un ripâr artificiâl che al pare i insets e altris animâi piçui.
Ogni materiâl che al è dentri al ven colonizât di grups diferents di speciis, deventant cussì un habitat specific par ognidune di lôr. Par esempli, âfs e jespis di speciis solitariis, ancje lôr fondamentâls intal procès di difusion dai polins des rosis, a puedin doprâ fros e lens sbusâts par ovâ. I setôrs dongje dal teren, plui umits, a puedin jessi ocupâts invezit di piçui animâi de jetere tant che isopots, diplopots, gasteropots e altris ancjemò.
La stazion meteorologjiche che e je tal museu e permet di campionâ:
- temperadure
- umiditât
- cuantitât di ploie
- aiar (direzion, intensitât)
- evapotraspirazion
- iradiament
- rais UV
Ducj i dâts rilevâts, adun cun cualchi elaborazion e simulazion, si puedin consultâ in cheste pagjine .
Tal zardin dal Museu a son stâts gjavâts fûr piçui tocs di tiere dulà che si son semenâts grans antîcs e liùms autoctons di speciis dopradis in agriculture za dal Neolitic (plui o mancul 7000 mil agns indaûr), come che al è documentât tai sîts archeologjics de Italie setentrionâl. Tai laboratoris dedicâts, i partecipants a podaran sperimentâ lis diviersis fasis de coltivazion neolitiche: de aradure e de semine ae eliminazion des jerbatis des culturis, fin ae racuelte, ae seseladure e ae batidure. Scuvierç cul archeobotanic Mauro Rottoli cualchi aspiet de agriculture neolitiche.
Inte alte planure furlane e intes areis morenichis, caraterizadis di terens glereôs puars di nutritîfs, si puedin formâ pradariis magris, clamadis propit magrêts o cjamps magris. A son dôs tipologjiis fondamentâls: i magrêts primitîfs e chei evolûts. I magrêts primitîfs a son pradariis discontinuis, dulà che si viôt une vegjetazion di stepe.
I magrêts evolûts o prâts stabii, invezit, a son caraterizâts di un contignût di nutritîfs plui grant tal teren e di un strât di jerbe omogjeni e continui. A son tra i habitats furlans plui siôrs di speciis vegjetâls e a vegnin mantignûts ancje in graciis dal seâ e dal pasc.
La racuelte diferenziade e je une pratiche facile, che e pues pardabon fâ la diference: cuant che o riciclìn, i materiâi a vegnin convertîts in gnûfs prodots, limitant il consum di risorsis naturâls. In cheste maniere, di fat, si puedin ridusi une vore i procès di estrazion des materiis primis dal ambient e e pues calâ cetant la cuantitât di refudums mandâts aes discjariis e ai incineradôrs, contignint lis emissions di sostancis che a incuinin. La sielte plui sostignibile però e scomence cu la riduzion drastiche de produzion di refudums, cul incentivâ il riûs e il recupar dai materiâi e cul limitâ i straçaments (par esempli tai imbalaçs) tes fasis de produzion industriâl. Il Museu al favorìs e al incentive une produzion di refudums minôr e une racuelte diferenziade corete.
Arbui e arbossits a àn ciclis vitâi tant plui luncs che no i animâi, ma dut câs a son ancje lôr destinâts a fasis di senessence, deperiment e muart. Une vore dispès, in particolâr intai boscs, i oms a tirin vie il len muart parcè che lu viodin tant che une sorte di refudum, un scart di eliminâ. Al è invezit un element preziôs pe biodiversitât, e la sô presince intai ecosistemis forestâi e incrès une vore il numar di speciis presintis. A son tancj i invertebrâts (clamâts saproxilics) leâts al len che al fraidìs, ma cheste risorse e je fondamentâl ancje par anfibis, retii, uciei e piçui mamifars, che a cjatin ripâr, puescj dulà ibernâ, e pussibilitât di cjatâ fonts di mangjative. Il len muart al è un habitat impuartant ancje par foncs, lichens, musclis e par diviersis speciis vegjetâls. A nivel domestic, si puedin ricreâ chescj ambients cun piçulis tassis di lens, che a vignaran colonizadis in curt di diviers animâi.
La “Agenda 2030” e je un plan di azion globâl des Nazions Unidis, che si articole in 17 Obietîfs di Svilup Sostignibil (SDGs), nassût par combati la miserie, lis disparitâts e i mudaments climatics, promovint un svilup sostignibil dentri dal 2030. Ogni Paîs al è clamât a contribuî par chescj obietîfs. La aree dal Zardin dal Museu e je stade dedicade ae Agenda 2030, deventant un lûc dulà che esperts internis e esternis a organizin ativitâts didatichis e di divulgazion sui argoments dai SDGs. Il materiâl doprât par preparâ chest spazi al ven di forestis gjestidis in maniere responsabile e, cuant che nol coventarà plui, al vignarà riciclât.
Via Cecilia Gradenigo Sabbadini
22-32, 33100 Udine
Cemût rivâ al museu
0432 1273211
IT 
DE 
FR 
EN 