La Sezion botaniche e cjape dentri in colezions, sedi storichis che viertis, cirche 235.000 reperts, tra foncs, alighis, briofitis e fanerofitis.

Reperts impuartants di briofitis a fasin part des colezions Sguazzin, Musclis gjenerâi, Musclis furlans, Musclis Morassi. Par chel che al tocje i foncs, si àn di menzonâ lis racueltis di Fornaciari, Della Torre e Morassi-Corgnali-Gortani.

Lis fanerofitis a àn un puest privilegjât inte Sezion botaniche, cun cirche 165.000 campions di erbari, ancje in gracie dal lavôr fat di un pionîr come Giulio Andrea Pirona, autôr de prime flore furlane tal 1855 (Florae Forojuliensis syllabus), che a chê al è colegât il so impuartant erbari. Il so lavôr al à inviât une lungje tradizion di ricercjis su lis fanerofitis che a àn judât a fâ incressi i erbaris intai agns seguitîfs. Esemplis di cheste ativitât a son:
- i erbaris Morassi (5000 sfueis),
- i erbaris Comelli (3000 sfueis),
- i erbaris Pirona (2000 sfueis),
- l’erbari storic di Luigi e Michele Gortani (30.000 reperts cjapâts sù tes lôr esplorazions dal Friûl),
- i erbaris Forojuliense (45.000 sfueis, dome reperts furlans),
- i erbaris Martini (30.000 sfueis),
- i erbaris Cecconelli, Tonussi e Paiero (dome vencjârs).

Intai ultins agns, personâl specializât al è lât dilunc a fâ une revision atente dal materiâl, a metilu in ordin e a digjitalizâ i dâts. Chest al à permetût ai studiôs di doprâ la colezion intune maniere plui eficiente.