IT 
DE 
FR 
EN 
IL PROGJET IN NUMARS
REPERTs
DIGJITALIZAZIONS
PONTS
DI INTERÈS
PUBLICAZIONS
SIENTIFICHIS
VOLUMS
MONOGRAFICS
MOSTRIS IN CITÂT
STUDIÔS
ENTS E ISTITUZIONS
- IL PROGJET ARCHEOLOGJIE URBANE A UDIN
Intai ultins trente agns la archeologjie preventive e à metude in lûs la impuartance de realtât archeologjiche de citât di Udin. Intervents fats in sinergjie, ancje se no in maniere continue e in spazis limitâts, a àn ufiert ideis di rimarc par studiâ la storie di dut il sisteme insediatîf: il so interès al à origjins antighis e si disvilupe in mût paralêl cu lis primis scuviertis archeologjichis fatis in citât. Intal 2020 il progjet “Archeologjie Urbane a Udin” al è deventât une realtât cul obietîf di rielaborâ, integrâ e incrosâ i dâts archeologjics vignûts fûr dilunc dai lavôrs di ricualificazion urbane cun chei gjeologjics, archivistics e documentâi in gjenerâl. I risultâts a son stâts publicâts intune monografie par cure dal Museu Furlan di Storie Naturâl tal 2024.
Par aprofondî: Visentini P. (ed.) 2024, Archeologia Urbana a Udine, Udine, Pubblicazioni varie del Museo Friulano di Storia Naturale, 76.
Il progjet, promovût dal Assessorât ae Culture di Udin, al è stât coordenât dal Museu Archeologjic di Udin cu la colaborazion de Sorintendence Archeologjie, Bielis Arts e Paisaç dal Friûl-Vignesie Julie.
- IL CUEL DAL CJISTIEL DI UDIN
I risultâts che a àn dât plui sorpresis a son chei dal progjet pal cuel dal Cjistiel che la sô origjin e je stade simpri teme di dibatit. Di fat, il cuel al è pardabon une anomalie dal paisaç: al sta dal dut isolât intal mieç de planure furlane, cuntune base di 200 metris di diametri, alt 30 metris a pet des zonis dulintor. Midiant di une metodologjie interdissiplinâr, che e met adun lis ricercjis gjeoarcheologjichis, archeologjichis e etnografichis, a son stadis analizadis lis carateristichis di cheste culine che si è pandude dal dut artificiâl.
- IL TERITORI
La unicitât dal cuel dal Cjistiel si insuaze intun panorame plui larc, fat di une rêt fite di mutaris e vilaçs fortificâts di ete preistoriche. Par indagâ il pussibil valôr universâl straordenari dal cuel, si è fate ancjemò une altre ricercje cul fin di cognossi lis potenzialitâts dal teritori regjonâl. Duncje, e je stade comissionade une schirie di studis multidissiplinârs su la Protostorie in Friûl e intes areis dulintor par lâ insot tai aspiets culturâi e tai modei di organizazion sociâl e insediative di un teritori che si ricognòs pe presince dai tumui e dai cjastelîrs. I studis a son stâts publicâts intal volum 46 de Riviste “Gortania. Geologia, Paleontologia, Paletnologia” che a presentin riflessions sul paisaç culturâl preistoric de aree che e cjape dentri Friûl e Istrie.
Il Comun di Udin al aderìs ae convenzion dal Progjet “Protostoria in Friuli”, adun cun altris 16 Comuns, ven a stâi Basilian, Cjampfuarmit, Cjasteons di Strade, Codroip, Cosean, Dignan, Feagne, Flaiban, Listize, Merêt di Tombe, Midun, Montreâl, Puçui, Rivis Darcjan, Sedean e Spilimberc.
- LA IDEE DE CANDIDATURE
La unicitât dal cuel di Udin e il so cjastelîr – il plui grant di dut il Friûl – si inserìs intun paisaç in evoluzion continue, modelât de nature e dal om. Il progjet “Archeologjie Urbane a Udin” al à dât la ocasion par aprofondî il studi di un fenomen – chel de difusion des mutaris e dai cjastelîrs – che intal teritori furlan si è mostrât particolâr par formis e cuantitât: si è palesade la relazion strete cul contest dal teritori, interpretât tant che espression de identitât culturâl e spazi di stratificazion e conservazion de memorie, sedi individuâl che coletive. La candidature a Patrimoni UNESCO e rapresente une oportunitât gnove par valorizâ un patrimoni storic cun elements origjinâi, fintremai unics, e par dâ vôs a un fenomen culturâl antîc che al tocje dut il Friûl, ma che al rive fin ae Istrie.
Mark Pearce, professôr te Universitât di Nottingham, al à fevelât di chest tal so intervent in ocasion de presentazion dal volum “Archeologjie Urbane a Udin”.