Il progjet, promovût dal Assessorât ae Culture di Udin, al è stât coordenât dal Museu Archeologjic di Udin cu la colaborazion de Sorintendence Archeologjie, Bielis Arts e Paisaç dal Friûl-Vignesie Julie.

I risultâts che a àn dât plui sorpresis a son chei dal progjet pal cuel dal Cjistiel che la sô origjin e je stade simpri teme di dibatit. Di fat, il cuel al è pardabon une anomalie dal paisaç: al sta dal dut isolât intal mieç de planure furlane, cuntune base di 200 metris di diametri, alt 30 metris a pet des zonis dulintor. Midiant di une metodologjie interdissiplinâr, che e met adun lis ricercjis gjeoarcheologjichis, archeologjichis e etnografichis, a son stadis analizadis lis carateristichis di cheste culine che si è pandude dal dut artificiâl.

La unicitât dal cuel dal Cjistiel si insuaze intun panorame plui larc, fat di une rêt fite di mutaris e vilaçs fortificâts di ete preistoriche. Par indagâ il pussibil valôr universâl straordenari dal cuel, si è fate ancjemò une altre ricercje cul fin di cognossi lis potenzialitâts dal teritori regjonâl. Duncje, e je stade comissionade une schirie di studis multidissiplinârs su la Protostorie in Friûl e intes areis dulintor par lâ insot tai aspiets culturâi e tai modei di organizazion sociâl e insediative di un teritori che si ricognòs pe presince dai tumui e dai cjastelîrs. I studis a son stâts publicâts intal volum 46 de Riviste “Gortania. Geologia, Paleontologia, Paletnologia” che a presentin riflessions sul paisaç culturâl preistoric de aree che e cjape dentri Friûl e Istrie.

Il Comun di Udin al aderìs ae convenzion dal Progjet “Protostoria in Friuli”, adun cun altris 16 Comuns, ven a stâi Basilian, Cjampfuarmit, Cjasteons di Strade, Codroip, Cosean, Dignan, Feagne, Flaiban, Listize, Merêt di Tombe, Midun, Montreâl, Puçui, Rivis Darcjan, Sedean e Spilimberc.

Mark Pearce, professôr te Universitât di Nottingham, al à fevelât di chest tal so intervent in ocasion de presentazion dal volum “Archeologjie Urbane a Udin”.